突擊測驗

Lunch 之後番 lab，坐低 check e-mail，五分鐘後老細帶住一個白頭佬入黎。

老細：「呢個係我當年做 post-doc 時o既老細，」
老老細你好。

「〔下刪幾十字介紹〕，佢起溫哥華飛過黎，我原本想介紹你個 project 俾佢知，不過冇時間，你可唔可以講〔之前個 PhD〕 份論文、你上年份 project report 同近期做o既野俾佢聽？」
心離了一離，冇 notice，咁大整蠱？冇問題，真金不怕洪爐火，怕你？吹都唔得，仲駛起呢行企o既？

「我而家要去湊仔，個幾鐘後返，之後會返黎接佢食飯。」
拿拿拿，好啦喎，今日留一線，唔好去得咁盡好喎大佬，冇俾 MPF 仲要吹一粒鐘，家陣點計先。

如是者吹了個幾鐘水，又好似意猶未盡，同大粒佬交流真係得益不少，吹下吹下好多野講，其實幾好玩。不過，下次俾 D notice 好 D。

最後，走時嚮超市見到個染紫毛o既阿婆買野。

朦朧的眼鏡

繼續重聽舊唱片，今次是 Blur。我突然想起一個人。

初中時我是丸尾末夫，而當時我亦認識一位小玉。印象中在《櫻桃小丸子》裏，丸尾和小玉沒有很多交流，現實中「丸尾」和「小玉」也沒有甚麼，所以先旨聲明，請不要誤會。

「丸尾」和「小玉」是法國文化協會法語班的同學，班上沒有花輪，也沒有賓治。當時她拿著一盒巧克力請全班吃，除此之外我對她完全沒有印象。之後在機緣巧合之下在另一個地方又做了同學，開場白也是順理成章的：「咦，你係唔係…？」地點是一個羽毛球場。

之後的話題急轉了去音樂，因為我當日好像是拿著 Travis 的【The Invisible Band】的。跟著的好幾日我們差不多日日都在校車內談不同的國際 artist，當年在中學日日被偶像派粉絲圍著的我好像突然找到了一個 soul mate，而以當時來說，她認識的音樂也實在是太多了。

「你有冇聽 Blur？我起阿哥度攞黎聽，真係好鍾意《Beetlebum》！」
「Diana Krall？有呀，呢排我都有聽 jazz，Ella (Fitzgerald) 真係好正！」
她是一個爽朗直接的人，也非常健談。

之後偶爾在 ICQ 談了幾次，轉 MSN 後便沒有再聯絡了，也許是當年不太重視「友情」這 concept 而沒有刻意去維繫吧，很多 contact 都是在轉 MSN 這個 cut-off point 而失去的。由一瞬間的 soul mate 變成生命中的一名過客，都只是因為懶，很可惜。

原來生命中曾經出現過一位有趣的人。老套一問，不知這位「小玉」現在如何呢？特地寫這一篇記下，因為我知道我將會再忘記她。

愛的戰士

今日收到了 Sade 的新碟【Soldier of Love】。

第一個感覺是：「嘩，十年啦？」

十年前扮成熟去 HMV 買【Lovers Rock】聽，當年很喜歡《King of Sorrow》。

十年。
當年的 Channel [V] 有很多國際音樂節目，Christina 和 Britney 還在大鬥法，尖沙嘴的 HMV 有幾層高，行完搭天星過海之後不用經 IFC，又可以去大會堂睇 concert listing。現在只有搭地鐵，Oh I mean 港鐵，看海港的享受被褫奪，換來的是望住對坐的毒男在打 PSP 和鄰座的軀殼在呼呼大睡。還有還有，國際都會的冧把溫也不是打煲呔的，大氣電波也好像比今天少戾氣，雖然茶杯裏都有風波。

十年人事，國際都會的愛在哪裏？戰士又會是誰？

西貝流斯

春回大地，令我想起北歐的夏季。

於是連續兩晚聽了 Sibelius 的音樂，今晚的是《第七交響曲》。

為甚麼我總是錯過了最簡單直接、美麗的東西？沒有大上大落的火花，一段流暢的旋律已很優雅。

週七兩則

上個星期去得很盡。星期一做 lab 做到十一點，之後晚晚要趕要教的 Thermodynamics，自己做完之後又要改學生的，基本上日日都用枯燥去麻醉空虛，時間這概念已變得不重要，畢竟睡眠只是工作甲與應酬乙之間迫不得已的行為罷了。到最後，身體比靈魂更早放棄，所以星期四開始便只坐下來讀 research paper。再做？睬你都傻，Department 又冇俾 MPF。

－～－

老細寄來了兩封電郵，都是關於 conference 的，一個在 Michigan，另一個在愛丁堡。恰巧兩個都是在 first-year report 的 deadline 之前一、兩個星期，時間上有衝突，於是走去問問老細意見。結果呢，耐人尋味。下為漢化譯版：

吾：「老細，時間唔就喎，點算？」
其：「你可以早 D 寫好份 report，一早交左佢，之後咪當放一個星期假囉。」
吾：「但係有一 part project 仲未開始喎，點知有咩寫？」
其：「話時話，係時候同〔collaborator〕傾一傾另一 part 做 D 咩。你知佢啱啱番左黎啦？」
吾：「吓？」
其：「o個條友，以為佢去o左 conference，點知原來去o左滑雪。真係離晒譜。」
吾：「係咪去左溫哥華睇奧運呀？」
其：「溫哥華，嘩，想當年我做 post-doc，開完會，坐起山頂，前面見到溫哥華城市，後面見到無窮無盡o既山巒，嘆住茶望住日落，真係人間仙景。」
吾：「唔…」
其：「我做 post-doc 時個老細呢，唔鍾意滑雪o架喎。佢老婆呢…」
吾：「老細…」
其：「佢老婆呢，係一個好聰明 o既傳統 biochemist。佢呢…」
吾：「Eh…」
其：「（下刪數百字）」

如是者坐著聽了一大段故，都未找到答案，但我很想去看雪景。

太陽

如果天晴的話，我在國際學府住的地方可以看到日出，入夜時可以看到日落。只坐在能旋轉的工作椅上便能看到世界的轉變，有閒情逸緻欣賞的話的確是件賞心樂事。週末時，拿住一杯熱飲望天打卦，彈一段德布西，讓一至五朝十一晚十踩盡油的生活慢下來，給腦袋呼吸的空間。遠眺樹上的綠葉隨風搖曳，近看昨晚遺下的雨水泛起漣漪，再細聽自己的心跳－－一段段像是回憶的 deja vu，究竟是多少年前的事？

再延伸想一想，在國際都會有沒有這機會、一個給人細看生機的可能性呢？我想我還是樂觀的，只需要 extra effort 罷了。我倒相信美景是一直存在的，只是給象徵著文明現代的高樓大廈遮掩著而已，因為很久以前我每一日都看到。

不經不覺，春天已經在零下溫度爬進來了。

新年快樂！

打電話回家拜年。

「喂？恭喜發財！」

「新年快樂！最緊要係身體健康、笑口常開、日日都咁開心！」

「係呀、係呀，最緊要係呢兩樣呀！你呀，學業進步呀，俾心機讀書呀，考個狀元返o黎請你飲茶呀。英國凍唔凍呀？教 D 學生教成點呀？」

雖然個個親戚都這樣說，但那是真心的問候。高錕發明的光纖，除了可以接通地球的兩邊，亦可以傳達家人的暖，令人在零度的劍橋下感受到過節的氣氛和真正的意義。回家真好。

在此祝大家新年快樂、身體健康、笑口常開！虎年事事順利！

話時話，結了婚的你妳你妳今年派唔派利是？